Халқ таълими  вазирлиги ва Ўқувчиларни касб-ҳунарга  йўналтириш  ва педогогик-психологик Республика Ташхис маркази мутахассислари томонидан 9-синфни тугатаётган ўқувчиларни таълимнинг кейинги босқичига тўлиқ қамраб олиш юзасидан янги дастур ишлаб чиқилди. 

www.tashxis.uzсайтига жойлаштирилган янги дастурда жорий йилда умумтаълим мактабларининг 9-синфини тугатаётган 533 658 нафар битирувчилар ҳақида барча маълумотлар жойлаштирилган. Жумладан, дастурда ҳар бир мактаб битирувчиси ҳақида маълумотлар, уларнинг қайси академик лицей ёки касб-ҳунар коллежда ўқиш истагини билдирганлиги ҳақида маълумотлар жойлаштирилган. Шунингдек, дастур орқали ота-оналар республикада фаолият кўрсатаётган академик лицейлар ва касб-ҳунар коллежлари ҳамда улардаги йўналишлар билан яқиндан танишишлари мумкин.

Дастур 9-синфни тугатаётган ўқувчиларнинг  таълимнинг кейинги босқичга қамраб олиш жараёнларини мониторинг қилишда ортиқча вақт ва қоғозбозликнинг олдини олади. Дастур маълумотлари асосида битирувчилар орасида қайси йўналиш ва мутахассисликка бўлган қизиқишнинг катталигини ва аксинча қайси соҳа ва мутахассиликларга талабнинг камлигини аниқлаш мумкин. Ўз навбатида бу таҳлилий маълумотлар келгусида янги иш ўринларини яратиш ва иқтисодиётимизнинг реал секторларини ривожлантиришда муҳим аҳамиятга эгадир.  

Ушбу дастур 3 та асосий қисмга бўлинган бўлиб, кенг жамоатчилик, мактаблар ва она-оналар учун мўлжалланган. Дастурдаги битирувчилар ҳақидаги маълумотлар мактаб маъмурияти томонидан бириктирилган масъул ходим томонидан киритилади.

Шунингдек, ушбу дастур орқали 9-синф битирувчилари сони, умумтаълим мактабларида ўтилаётган таълим тиллари, cўровнома натижалари асосида танлаган таълим муассасалари, академик лицей ва касб-ҳунар коллежлари ҳамда бу ердаги тайёрлов йўналишлари ва соҳалари ҳақида статистик маълумотларни билиш мумкин.

 Ушбу дастурдан халқ таълими муассасалари фаолиятини методик таъминлаш ва ташкил этиш бўлимлари ҳам унимли фойдаланишлари мумкин. Хусусан, ХТМФМТТЭлар дастур орқали бутун республика халқ таълими бошқармалари ҳисобот жадвалларини шакллантириш ва ўзаро фикр алмашиш имкони яратилган.

Халқ таълими вазирлиги Ахборот хизмати билдиришича, жорий йилда умумий ўрта таълим мактабларининг 9-синфини 533 минг 658 нафар ўқувчилар тамомлайди. Улардан 51 минг 719 нафари (10.2 %) академик лицейларда, 481 минг 939 нафари (89.7 %) касб-ҳунар коллежларида ўқиш истагини билдирган.

Манба: http://www.12news.uz